المرأة والطفل

طلاق وخلافات بين أشباه رجال وأشباه نساء وقانون نفقه فاشل واطفال تضيع

بقلم : اميره همام المحاميه

كلنا سمعنا عن الام والاب اللي سابوا أولادهم على السلم واتهامات متبادلة
ولكن هنا مين اللى ساب الاولاد على السلم فعلا ؟ الام اللى تركتههم للاب ؟ واللا الاب اللى تركهم فعليا؟ واللا القانون اللي بيخلى قضية النفقة تقعد سنين فى المحكمة والام تتكفل مصاريف القضاء وهي اصلا لا تملك مصاريف الطعام والمعيشه ؟
هذه الحكايه ليست مقصوره علي قصه اطفال السلم فقط بل هي حكايه تتكرر يوميا بصور مختلفه واشكال مخذيه للغايه .

الام اتخانقت مع الاب
تركت البيت والاولاد لابوهم لأنه رب البيت والراعي المسؤل الذي سوف يحاسب امام الله عليهم .
الاب بعت الاولاد لامهم عند بيت ابوها لأنه من أشباه الرجال ولا يريد تحمل مسؤوليته تجاه أولاده .
هنا تنتج الاسئله.
اهل الام يسالو مين اللى هيصرف على الاولاد ؟
اهل الام يقولو احنا مش هنربى ولاد حد….
الام لاحول لها ولا قوة لانها مش بتشتغل او بتشتغل شغل ما يكفيش تربية العيال
ولو حتى هتشتغل مين هيربي ويتابع
الستات عارفين وبيقولو لبعض ان محكمة الاسرة لو راحت تطلب نفقه هتلففها كعب داير سنين ومصاريف قضايا.
بنك ناصر مش هيدى فلوس الا بحكم محكمة يعنى بعد سنه او سنتين حسب الحكم واعلى مبلغ ٥٠٠ جنيه.
الام معندهاش تصرف.
القانون بيقول الاب هو الولى الطبيعى والمسئول عن الانفاق
الاب بيزور فى دخلة قدام المحكمة فى قضية نفقه ويطلع نفسة مفلس والمحكمة عارفة ومحدش بيعمل اي قضية تزوير فبعد سنه او سنتين يصدر حكم خايب ملوش لازمه مياكلش فرخه .
الإعلام والسوشيال مديا والحكايات والدنيا عرفت الستات ان مش هتعرف تاكل العيال.
الام رجعت الولاد لابوهم
الاب رماهم على السلم
مين المسئول ههههههه أو رماهم في اي حته أو تركهم بدون راعي
اين محكمة الاسرة اللى بتسيب العيال ياكلو طوب وامهم سنين فيها بدون فلوس ونرجع نقول الاطفال بتنحرف ليه واين الام اللي تحولت في لحظه لام واب اي فلوس وتربيه هل هذا انصاف هل هذا يرضي الله ؟ قانون الاسرة اللى اسهل حاجة فيه تزوير الدخل فى قضايا النفقه لحرمان الستات والاطفال من اى دخل ؟ اين الدولة من حماية الأطفال اين الأحكام الرادعه اين طرق تنفيذه الأحكام التي تجبر الرجل علي تحمل نفقات أولاده ؟ في حين أن بنك ناصر اللى بيدى ٥٠٠ جنية بعد صدور حكم خد سنين مياكلوش فرخه ؟
قدام كل دا كل يوم بيزيد عدد الامهات اللى بتلاقى نفسها عاجزة فتسيب الاولاد لابوهم أو تتبهدل بيهم في الحياه بين عمل لجلب الرزق وبين تربيه لا تستطيع عليها
وتكون النتيجة اللى شايفينها دى أطفال شوارع اطفال على السلالم اطفال مدمنين اطفال منحرفين اطفال مرض نفسيا ومحطمين من الداخل
للاسف للاسف ومع زيادة العنف الاسري اللى محدش بيتحاسب عليه
ومحاكم الاسرة واللى فيها
اعداد الامهات اللى بتسيب البيت واطفال مصيرهم مجهول
اللهم اني بلغت رسالتي هذه لكل من يهمه الامر

زر الذهاب إلى الأعلى
WP2Social Auto Publish Powered By : XYZScripts.com
إغلاق
إغلاق