مقالات وآراء

تحية للمدرس  …

المدرس إذا صنع تلميذ ناجح متفوق فقد صنع وطن

ألقيتها في برنامج بكرة أحلي حلقة 12/10/2017 –
أنت في إيدك كل حاجة 
أنت اللي بتقدر تعلم
وأنت اللي بتقدر تفهم
وأنت اللي بتعرف تأسس
أنت بتبني طوبة طوبة
مش من أسمنت ورمل
أنت بتبني فينا عقل

أنت اللي بتطلع حرامي
لما ما تقولش المبادئ
وأنت اللي بتصنع عصامي
لما تعلمنا الحقايق

أنت في إيدك تبني أمة
وأنت بإيدك تبني همة
أنت اللي بتعلمنا السكة صح
لما تكتر في حياتنا المفارق

التعليم مش بس اكتب
ولا إقرا ولا قول كلام جميل
التعليم ده صنع حاضر
صنع مستقبل وجيل

بيك في يوم الأمة تنهض
وبيك برضو تنهار وتمرض

أنت لو تعرف مكانتك
كنت نسيت تطلب فلوس
أنت ليك مكانة عالية
في الوجدان وفي النفوس

حقك فعلا تعيش مرتاح
وما تكون أحلامك كابوس
ولا داير جوه ساقية
من المدارس للدروس

لكن خدها مني نصيحة
أنت لما بتبني مجد
وتزرع خير في أي فرد
وتبقي ما بينا وبين الضياع
جدار وسد
ساعتها تبقي تعرف
إنك مش زي أي حد
وعلشان كده أنا عاوزة منك
كلمة فيها ميثاق وعهد

إنك تعلم ولادنا فين حقوقهم
وفين واجبهم تجاه بلدهم
اللي حبها سنة وفرض
عاوزة تصنع شباب واعي
يعرف إن بلده حماها
واجب وعرض

شباب قد المسئولية
وعارف أيه هي القضية
يقدر يقول لمصر قومي
وأنهضي وإسعدي
أنتي يا مصر أمانة

وحبك في قلوبنا عايش
وأرضك نفديها بدمانا
لأنها مش أي أرض

وتحية للمدرس
اللي علمنا المباديء
واللي كان في واجبه صادق
واللي بيصنع بينا بكرة
وشمسه تشرق ما المشارق
أنت وحدك دورك أكبر
من كل دور
وأنت وحدك بتعلمنا
إزاي نثور
علي الضعف والتخاذل
والشرور
وتعلمنا إزاي نصنع طريقنا
والجسور

منك الهمة القوية والعزيمة
منك اللمحة الذكية والكريمة
إنك تاخد بإيد الجيل
وتصنع مصر العظيمة
والتحية للمدرس
بقلم / كواعب أحمد البراهمي

مقالات ذات صلة

زر الذهاب إلى الأعلى
WP2Social Auto Publish Powered By : XYZScripts.com
إغلاق