تقارير

من قال لا أعلم فقد أفتى…بقلم/ الخبير الأمنى اللواء خيرت شكرى

 متابعة عادل شلبى

مش عيب إنك تكون مش عارف ، لكن العيب إنك تدعي المعرفة وانت مش عارف ، احنا عندنا مثل شعبي بيقول ( من قال لا أعلم فقد أفتى ) ، تخيل إنك لو قلت معرفش كأنك أفتيت ، وطالما انت بتحب الفتي ، يبقى لو حد سألك فأي حاجة قول معرفش ، لأنك فعلاً متعرفش ، ومش لازم تتكلم في كل حاجة ، لأنك مش كل حاجة ، يعني مينفعش مبيض محارة ( مع احترامي للمهنة ) يتكلم في الطب أو هندسة الكباري ، أو دكتور يفتي في السباكة ، في حاجة اسمها التخصص ، وكل واحد أدرى بكاره الوظيفي ، أنا ليه بقول كده ، لأني شفت واحد على صفحة الفيسبوك بيدعو للحرب مع تركيا على أرض ليبيا ، و بيحرك وحدات و بينقل قوات من حدود مصر الغربية لمدينة مصراتة ، بصراحة حسيت اني قدام قيادة عسكرية كبيرة لها خبراتها ، وحب الفضول خلاني أخش على صفحته ، ولقيته مدرس أزهري ، و كل علاقته بالعسكرية ، هي شهادة إعفاء من الخدمة العسكرية ” لعدم الصلاحية ” .

الكلام ده مش مقصود بيه حد بعينه ، في ناس كتير بتنكسف تقول معرفش ، يمكن علشان البرستيج الاجتماعي أو الوضع الأدبي أو لمكانته الوظيفية ، ودول اللي احنا بنسميهم أنصاف المتعلمين ، طبعا حا تستوقفك كلمة ” احنا ” وحا تقولي ” أنتم مين ” حا قولك احنا النص التاني من أنصاف المتعلمين ، اللي فهمنا العيب فين وبنحاول نصلح عيوب النص الأول ، وأول خطوات الاصلاح ، إننا نعرف النص الأول من أنصاف المتعلمين العيب فين ، ونعود لساننا على كلمة منعرفش علشان احنا فعلاً منعرفش ، ونتكلم بس في تخصصنا واللي احنا نعرفه . حتقولي تقصد إيه من الكلام ده ، حقولك معرفش .

close
اظهر المزيد

مقالات ذات صلة

زر الذهاب إلى الأعلى
إغلاق
إغلاق
%d مدونون معجبون بهذه: